Kultura

From Kaskosan
Jump to navigationJump to search

Aćhara

Ansuripe

Bori savo.JPG
Grast.JPG

E matrimoniako koncepto pala Rromani Patĭv: matromonia naj khanći aver numaj e ternenge dadenge thaj dejange (vaj kodole manuśenge kon bararen thaj len griźa pala e terno/-i, kon lel rromes/rromnă; kas si vorba anda lengo than), mangipnaski manifestacia (latin = affectio maritalis) so kamel te bianel e matrimonia. O mangipnasko akto si manifestime angla kodo manuś, kas si bari patĭv angla o sasto/intrego khetanipe.

Angla matrimoniako arakhadĭpe si trin faza:

Mangavipe – a mangipnaske aktoski manifestacia te phandadŏl o prandipe/ansuripe maśkar e ansurimaske dźene so avel khatar o manuś kas si vorba anda ternengo than; kanae jekhe ternes naj dad vaj dej vaj kasavo manuś anda lengo than vorbasa palkodo ipso facto vov/voj śaj te lel o akto pala pesko ćaćipe – sui iuris.

Angla o mangavipe

Familia “A”: dźamutreski familia Familia “B”: borăki familia

Familia “A”: “si tumen jekh śukar ćhej thaj amen pale jekh śukar ćhavo, śaj avas te dikhas tumara śukara ćha kurke?” Familia “B”: “Śaj dźan te dikhen vi jekha princojka, sostar naśtik murra ćha?”

Te si vorba aba pe i ćhej, kaj sas la aba varekon, vareso kamado, vaj kamelas varekas aba ilestar vaj vareso svato ke voj xasardas pesko uźo statuso thaj śaj nići paślĭlas khanikasa/nikasa, atunći maj butivar e dźamutreski familia nići dźal te mangavel kodola ćheja pe kaste gele tar e nasula vorbi. Avere vasteste, kana von kamen te len kodola ćheja pe kaste gelas tar e vorba (te phenas o dźamutro kamel e ćheja, lesko dad kamel te phandel pe maj paśe paśa ćhejako dad misto varesoste) atunći e dźamutreska familia avela privilegia sar ći trubul te organizuin baro biav/abav thaj kade ći trubul bare love te pokinen. Numaj generalo, kana si vorba pala ćhej, pala lako uźo, patĭvalo statuso, atunći e dźamutresko dad thaj dej śaj ingren la k-o doktoro te len papiro pala lako ćhajipen. E investigacia śaj pecil pes angla e deja sar so e avindi sokra/sasuj mangela kado. Voj te si ćhaj, familia “A” mangel e maj patĭvale rromes maśkar e rrom te dźal lenca te mangavel e ćheja khatar familia “B”.

Kade o mangavipe kerdŏl legitimo soske o rrom kas e maj bari patĭv si dźanel pe ternimata thaj del peski vorba haj konsento paśa lengo ansuripe/prandipe. E patĭvale rromes (maj butivar o maj phuro rrom) numaj formalo rola si khate. Familia “A” ingel xabe thaj piimata kaj familia “B” thaj ći den duma imediat pe mangavipe numaj keren pe sar vizita te kerenas kaj familia “B”. E murśa, e rrom beśen kaj a bari mesală thaj e dźuvlă, romnă pale beśena khetane e ćhavorrenca ande separato livnĭ/soba vaj ande soba pe kaj aver mesală ande sa jekh soba kaj so vi e rrom beśen. Pala varesavi vrama o maj patĭvalo rrom vaj e avindi sasuj phenel e ćaći vorba, andar soste gele von khote kaj i familia, no aba savorre dźanen kado. Sako vorba ande scenario si pindźardo khatar sako dźeno aba thaj sako kerel peski rola ando khelipe. Po agor pućhen vi la ćhejatar voj te kamel e ćhaves vaj na thaj normalno voj ći del palpale numaj asal. O scenario te resel ape kado punkto, naśtik phenel “na” ke sa si kerdo aba, numaj nići naśtik phenel “va”, soske kodo kerelas baro ladźavo e e ćhejake familiake thaj kado maj lokhi butĭ si e dźamutreska familia “te keren mita” opral i bori. Pala kodo e borako dad phenela so vov thaj leski familia mangela pe bori: normalno vov mangela jekh abav thaj love/pare. Sode love, kodo śaj avel khatar 3-4 milă dollara dźi k-o 10 milă. Kana sa si kerdo aba, atunći e sasti familia kondźarel/getoj pe pe biaveste. Śaj mukhen duj-trin ćhon e ternenge te pindźardŭven jekh-jekhaveresa, numaj naj len e śansa te dikhen pe korko, soske savaxt si khote varekon lenca, śaj jekh phral, phen, nano/kak, lala/bibi vaj kuzino, kaj te na avel fizikalo kontakto maśkar lende angla o prandipe.

Biav, abav – e dźamutresa dźal sasto narodo/nămipe (von si e dźene andar o thanutno khetanipe thaj anglal phirel o maj patĭvalo rrom lendar) thaj e baśalne kaj e borăke dadesko kher vaj kaj kodolesko kher kon barardăs e ćheja thaj si les vorba pe late. Pala kodo pale keren o formalo mangavipe angla sako dźeno andar o khetanipe thaj pale si te keren manifestacia pala mangipnasko akto e dada thaj deja thaj kado pale zurarel e “legitimacia”. Naturalo sako dźeno dźanel pe sogodeste pe kadi vrama. Pala kado sa e gostura dźan e ternimatasa po biav so inkrel dźi pe detehara/javin. Pe ratăko maśkar resen kaj “khelimaske love” so phenel ke sakones si jekh paluni śansa te kinel la boră pe jekh khelipe pe unĕ minutura te pokinena pe kado. E rroma na anen khanći e ternenge po biav numaj sako gosto musaj te del love paśa kodi summa pe kodi vrama. E maj but rrom ći ingaren e ternen te prandisajven ande khangeri vaj civilno. E ternimata śaj len e decizia te len pe maj palal oficialo thaj/vaj ande khangeri ande unĕ berśa numaj kodo si maj butivar andar administrativone kauza.

I angluni rat – e ternimata mukhen o biav pala ratăko maśkar thaj dźan tar ande dzamutresko kher thaj aćhon korko pe pengi anlguni rat. E ungrikone tradicionalone rromane khetanimata amende ći śuven baro fokuso te kontroluin e borako ćhejipen pala i angluni rat soske von ingren e ćheja te k-o doktoro te dikhen ke lako hymen naj azbado aba angla o biav.

Sankcia ande Rromani Patĭv: te dźangadŏla k ei bori xasardas pesko ćhejipen maśkar o mangavipe thaj o biav atunći/posle e dźamutreska familia si o ćaćipe te bićhalel le boră khere thaj laki familia si te pokinel e love palpale so line pe borate. Pala Rromani Patĭv lako trajo marhime aćhol, thaj lako trajo avela katastrofa ande lako dujto ansuripe/prandipe thaj lake rromes avela ćaćipe te marel la misto lako melalo trajo so sas la. E kauza – sar so o consuetudo ande Rromani Patĭv phenel – ke jekh bipatĭvali ćhej naśtik te kerdŏl patĭvali rromnĭ. E dźamutreski doś te si kaj e terne mukhen pe, naj sankcia po dźamutro thaj e ćhejako trajo pale aćhol marhime sarso laki doś te avilo kaj mukhlas la lako rrom.


Meripe

Roma funeral1.jpg
Roma funeral2.jpg

Kana merel jekh manuś maśkar e rom, atunći sa e dźene khatar e familia aresen pe ando kher, kajso beśelas o manuś, kon mulo khatar o dyes kana mulas dźi k-o praxomasko děs. Kadi tradicia jekh cerra parudyilas ande bare forura kajso śaj lel pe duj kurke te praxosarel pe vareko. Na numaj e maj paśutne nyamondar – dad, dej, papo, mami – no savorrendar adźukarel pe te resel pe pomána. E rom jekhe colosa vaj kapasa śaravena e glindi, foto taj televizia ande sa o kher kaj ten a sikadyol o mulo varekaj. Sako gosto ingrela pesa varesavo xabe vaj pimos pe muleski pomana, śaj ingren vareso special so kamelas o mulo. E murśa vaj beśena ande separato soba/livni khatar e romnya taj e ćhavorra ta e romnya pale ande aver. Kas naj módo, numaj pala jekh soba, khote e murśa taj e maj phure romnya beśena krujal e mesalya taj e romnya pale rigate. E murśa normalno ći randena pe, taj e dźuvlǎ pale ćhinena pengi ćunri kana vareko merel ande familia. Pala praxope sako manuś trobuj te thovel peske vast taj si te dźal ande jekh kirćima vaj restoranto kajso xabe taj piimata źukaren e manuśen taj kajso e rom resena pe palutni data te patĭvaren e mules. E manuśa naśtik te dźan vorta khére khatar e murmunci/limorro soske śaj te ingren penca varesave bilaćhe/nasula ogya ande pengo kher.

E rom patina, ke lenge múle beśena maśkar lende bare dyesengo, sar vi Krećunengo taj vi avere vastne/importante dyesengo, kodolestar kerena e rrom mesalya lenge taj ćhuvena xamasko so kamelas o mulo pe mesalya, kana von dźana khere te śaj arakhen vareso penge pe mesalya.

“Kana ame pas, xas, voja keras, atunći vi amare manuśenca keras kodo, kon aba naj maśkar amende” – khatar o Priboj, rom Kalderaśi andar Pećuj, Ungriko Them.



Bolipe

Christening.jpg

Kado kerena e katolika rrom. Vi lenge si but importanto te bolen jekhe cinnes so maj sigo soske e nasula benga kamen te aresen e cinneste aba kana kerdyol pe kadi luma. Dźi k-o patyiv kana kerela pe o bolipe, svuncime mirikle, baxtyardo foto taj loli dori phandela pe krujal e ćhavorresko vastorro. Sa kado si kerdo te inkrel e nasule odya dur khatar o ćhavorro. Kana ingrela pe khere o cinno ćhavorro khatar e bolimaski ceremonia, atunći śona pe leste jekh cinno kotor gad vaj poxtan e dadesko. Pala tradicia I dej ćhuvel e ćhavorres pe phuv. O dad vazdela e cinnes peste khatar I phuv taj śola jekh loli sirma krujal leski korr te sikavel angla sa e kumpania taj sa e manuśenge ke o ćhavorro lesko si.

Si but importanto te alon pe patyivále náśe e cinnóneske, kon patyiváles lena sáma pe leste taj pe lesko intrego/sasto trajo. Von trubulas te aven o dujto dad, taj e dujto daj a ćhavorreske taj kodolestar kamlǒl pe te inkren relacia e dadesa, dejasa taj cinnesa. Soske kadi butĭ si ćaćes seriozno kodolestar bute romende perel pe kaj duj naśe si kon aźutin lenge te aresen penge obligacie.


Kris Romani

I Kris Romani na numaj ferisarel/brakhel e romen khatar e avralutne taj andralutne traśa, no si vi sar kódo so jekharel e romen. O romano zakono kerdyilo te inkerel e romen separatno khatar e gdźikane manuśa.

  • E Romani Kris si kodi kohezivo zór so brakhel/ferisarel e romenge interesura, ćaćimata, tradicie taj etnikano averipe;
  • E Romani Kris si maj demokrativo desar orsavi kris soske na diskriminuil e individualon pala lovende vaj averende, taj
  • E Romani Kris inkerdas peski bazikani forma, vi kana si kodola phurane formatura e krisarimaske kajso naśavela pes o bezexaslo e romendar, no vi atunći si maj perfecto e avere gadźikane krisandar, so savaxt/sa e vrama paruvena pe.

Maśkar sako kumpania si jekh śerutno, jekh rom, kon alosardyola peske berśestar, butźanglimastar taj patyivatar. Kadaleske phenela pe Rom baro. O śerutno e rromane kumpaniako si o rom kaski zór taj intelligencia vazdel e patyiv maśkar e rom, kon peske trajosa sikavel o drom ángle e avere romenge. Vov arakhel e vorba maśkar e dźene kon xana pe peske patyivále divanosa/svatosa, taj e rom e kumpaniake dźana pala leski vorba, decizia. Numaj kana i butyi si pra bari, sar ćóripe, fizikálo máripe, parteneresko daravipe vaj komplikuime konfliktura maśkar manuśa, atunći akharela pe te jekh beśipe. Kado beśipe buśola pe: kris.

E phure e kumpaniake beśena jekhetáne te alosaren jekhe vaj maj bute romen, kon kerena I kris, von buśon e krisnitora. O dukhado astarel pesko ćaćipe te alosarel e krisnitores, kon kerela I kris pala lesko bajo, taj o manuś kaj ferij/brakhel pe, si les o ćaćipe te del veto pala alosaripe. E kris beśimaske dźene lena krujal e krisnitores, von si leske źutora. Generalo pandź vaj inke maj but dźene beśen ando konsili. E kriselinyake dźene si e vramake maj patyivarde taj maj butźangle rom. E dźuvla naśtik te beśen lenca. Khatar kadala dźene alosarela pe o maj phuro te śerárel o aśunimáta.

E kumpaniake śerutne butivar ći pindźaren sa e krísa. Kadala krísa inke na sas iskirime/lekhavde vaj kodifikuime. Von sas dine khatar jekh generacia dźi k-o aver. E rrom hatyarena e krisa pala e akanutne tradicie. E phurane hatyarimata e krisenge śaj te dikhen kana e situacia mangela kodo. O ekskluzivo patyaipe ande vorbaki zór tradas e romen karing felksibiliteta. No pe aver rig sako hatyarel ke o zakono si duślo/klaro. Feri unye dźene ći patyana kado. Kado zuralo inkeripe karing e krisa mothol sar śaj astarde khetane e rom dźi kaj naśaven len zoratar

Te akharel pe jekhetane I kris, kodo si baro andyipe ando rromenqo trajo. Ande sako suro o manuś dukhado si te mangel I kris so inkerela pe maśkar jekh neutralo kumpania. E dukhavde taj e dukhavne trubul te len kotor khote, no naśtik te akharen nići friśkárośes. Kana o viktimo/dukhavdo si phuro, nasvalo vaj but terno, atunći e viktimesko maj paśutno nyamo anel o bajo angla e kris. Kana e kumpaniako sastipe mangela jekhetani akcia, atunći intrego kumpania śaj avel o dukhavdo.

E krisake śunitóra varekana feri rom sas. E romnya, e ćhavorra, vaj e rom bićhavorrengo numaj atunći śaj lenas kotor ande kris kana vi von dikhle vaj aśunde vareso so si pala kris. Akana aba e intrego familia śaj beśel khote te del dumo peske manuśeske. E dźene śaj te den duma phuterdes pala suro. E rom patyana ke o ćaćipe ći kerela pe kana ći aśunel pe sa o bajo.

E rom patyana ke o fizikalo maripe taj e na-śeftáne relácie e gádźenca (na-romenca) si bezex mamuj e rom, protiv e kumpania, taj sa kodo si marhime. Kana vareko perela marhime, kodo numaj o dukhado śaj te lel tele kana jertosarel o bezex, e vrama vaj vi jekh aver kris Romani śaj te lel tele kodo.

Marhimé: e na-uźimasko statuso, kana naśavela pe o manuś e romendar.

E ulavimatake bajura si kompleksna. Vi adyes maśkar but rom e dada taj e deja dena e ternen jekhetane, so śaj na dźal pala gadźikani kris. E źamutreski familia potyinel love pala bóri. Kana jekh ansuripe dela gata, atunći jekh kris akharela pe, so śaj te phenel, sode love trubun irime e źamutreske familiake.

O krisatori mothol I kris savorrenge kon avena khote. Kana o dukhavno naj bezexaslo , inkerela pe jekh patyiv taj colaxarena pe e rom e paćake. E krisaki decizia si finalno. Vi ande thema sar e Espana taj Amerika, kajso nesave gadźikane dźantorra patyana ke e rom si dopaś asimiluime, ći khote na kerel khanći e gadźikani kris e romenge.

Kana pe krisako agor sikevela ke e dukhavno manuś naj bezexaslo, atunći si bari loś. Śaj inkerena pe bankettura, taj o dukhavno manuś śaj te baxtǎrel e manuśen anglunes. No kana phenena, ke o dukhavno ćaćes si bezexaslo, atunći maj but butya śaj te den pe leste. Kado śaj te avel khatar vi vareso simbolikano, desar te pokine pe e krisake love, te kinel pe xabe, pipe e krisnitorrenge, vaj vi sar te naśavel pe pe sa e vrama o manuś e kumpaniatar.

If, at the end of a trial, the defendant is found to be innocent, there is great joy and relief in the community. A banquet may be held, and the former defendant has the right to propose the first toast. If, on the other hand, the defendant is found guilty, any number of different penalties might be invoked. These range from the largely symbolic one of having to pay all court expenses, including food and drink for the judges, to the most serious of all, permanent banishment from the community of Roma.

E rom sa khetane arakhena e sankcia ande pengi kumpania. E romen naj policia vaj robija. Von ći inkravena e kris ando gadźikano drom. Ande kumpania sako dźanel e krisako agor taj kadi presia kerel vi te realizuil pe. E romani kumpania śaj te del armaja e bezexasle dźenes kaj te aven sigurno ke vov vaj voj akceptuil e kris dini, taj akana dikhela pe ke kadi praktika vi adyes si efektivo. Numaj unyivar kana e rom naśtik te arakhen pengo ćaćipe ande pengi kris, numaj palkodo boldena pe karing e gadźikane krisaki sistema. E kris romani śaj te mangel e gadźikane funkcionaren te astaren e bezexasles kaj ferisarelas/brakhelas pe. Generalo o bezexaslo akceptuila e romane krisaki vorba kaj kado punkto, taj palkodo peravela pe vi e sankcia. Kana o manuś dośalo inke ći mukhel anda’ pesko ćaćipe, atunći vov vaj voj śaj te aresel vi pe gadźikane krisalinaki kris. E gadźikane civilone krisalinaki vorba ći khosel e romane krisako svato angla romani kumpania.


Ande romani patyiv

  • Angle dinipe/baxtyaripe: kana duj rom resena pep o angluno drom, pala romani patyiv kade sit e den duma jekh-jekhaveresa (sar jekh poema, so sako dźanela śerestar):

A: Laćho dyes/dives, t’aves baxtalo

B: Te del o Del! T’aves vi tu!

A: Će vitsa san taj kasko ćhavo san?

B: Pa mure dadeski rig anda lovarengi pa mura daki ande kelderaśengi vitsa sim, e Lolosko taj e Linako ćhavo kaj ćhindyon anda Rusia pe jekh rig taj and Serbia pe aver. Taj tu, će vitsa san, kasko nyamo san?

A: Me sim a Koćakesko taj e Ruźako ćhavo ande le ćhurarengi vitsa. Vi pe katya taj vi pe kitya rig anda Polska ćhindyol amari familia. Muri phuri mami nasul romnĭ sas, kaj bararelas peske nepoton mure paposka ćugnisa.

  • Jekh patyivali romani ćhej ći phiravela lolo nivar/ći jekh data, numaj pe pesko abiav/biav te sikavel ke voj si inke ćhej bari.
  • Numaj kana thodan tu ande deteharin/javinate, palkodo śaj te des angle jekh romes.
  • E dźuvla si marhime khatar pengo maśkar karing tele numaj penge romenge naj vaj e avinde romenge. Kado pe jekh rig kamela te preventisarel e sila-zor pe romnya taj vi te phagel pe o ansuripe. Jekh dźuvli śaj te naśavel e nasul odya kana opre vazdel taj miśkisarel jekh peske coxandar.
  • Kana jekh romyi si marhime, e murś naśtik te vorbin late dźi kaj e krisatora ći len kodo tele pa late.
  • Jekh dźuvli naśtik te ćhinel jekhe romesko drom, vaj naśtik te phirel maśkar duj rom vaj angla o vurdon. Palal musaj te dźal, ke averćhandes śaj te boldel e dyes e romesko pe bibaxt.
  • E dźuvla taj e murśa beśena separato pe kumpaniake beśimata. E romnya, e ćheja si e ćhavorrenca taj e murśa beśena krujal e mesalya. E maj phure romnya śaj te beśen kaj e murśengi mesalya.
  • Kana e kumpaniake rom aresena pe, atunći dena svato pa maj pindźarde, maj godyavere taj maj patyivale manuśende (vi pa murśende taj dźuvlande). Dikhena pe vi e familiake relacie, kon kasko phrali, kon si duje phralenge ćhave taj avera. Kodolestar phenena but dźene ke e romani kultura si vorbatar naj khanći iskirime/lekhavdo/ramome.
  • E romani patyiv dur inkrela pe: jekh biandimasko dyes, abiav, vaj jekh spontano aresipe śaj te lel 2 vi 3 dyes. Sa e familia si khote, e dada, deja, ćhavorra, phral, pheja taj lenge ćhavorra, e phure taj atunći xana, pena, dyilabena taj khelena penge taj kerena pengi śukar voja.
  • Kana varekos si maśkar e rom (murśa), naśtik te del duma pala khanćeste, so aba marhime si, biuźo spiritualo vaj fizikalo. Kana vareko kamela te phenel vareso but importanto e averenge, jekh but lośali butyi (te phenas e romnyi perlas khamni) atunći si te mangel e romengi jertićija (śaj jerton). E rom musaj te mangen jertićia kana pomonina/liparena penge romnyan vaj kana vorbina pala vareso biuźi butyi.
  • Jekh romani ćhej naśtik te phiravel dikhlo dźi kaj peske abaveski angluni rat. Khatar kod erat trubul te phiravel les sako drom te sikavel ke voj aba ansurimej. Lungi taj buhle/bulhe coxi sit e phiravel taj naśtik te phiravel kalca vaj mini coax. Jekh bori naśtik te phiravel pe, makhel pe kade, so śaj avel provokativo vaj atraktivo seksualno.
  • Jekh harniko romnyi trubula te:
    • Bararel peske ćhavorren pala romani patyiv
    • Sa te inkrel śukares khere, te uźarel/źuźarel
    • Te del godyi peske romeske palal, sar jekh laćhi menedźerka te źutil les te śaj kerel laćhe love peske familiake taj te perel ando nasulipe
    • Te del dumo peske romes ande lesko śefto, kana si les vorba jekhe aver romesa vaj jekhe gadźase, gadźikane organesa.
    • Te kerel śukar mesalya ­– te kiravel śukares
    • Jekh romnyi naśtik te dźal pala pesko rom ande kirćima te inkrel pe khatar o marhipe. E romnyi si e familiako ilo, voj bararel e ćhavorren, voj sityarel le pe romani ćhib taj pe romanipe sako dyes. Kadi butyi sit e brakhel/ferisarel la ande jekh indirekto drom.

Muzika

Si maj but sar 15 milliona manuśa pe sundal/luma, kaske vuni ćhindyona e romendar, taj kas univerzalo ći hatyarena taj feri nasul kerena lenge. E muzika si butivar e phurt/o podo te śaj hatyaras varekas.

O manuś naśtik te arakhel definicia pala romani muzika, taj ći varesavo źaner so arakhle e rom. E rom savaxt labǎrena e dominantone kulturake muzikalone materialura pala pengi taj averengi voja taj inkrena kotora ande late so kerel te avel aver khatar e gadźikani taj po agor del ape vareso so buśola o romano stilo. Kado śaj te dikhel pe ande maj emocionalo, ritmikalo, zuralo, rangaslo taj dramatiko ćaćutnipe e artistisko.

Kodolestar e rom baśavena orsavo instrumento so baśavena vi e na roma. Śaj te arakhel pe khetano punkto maśkar e tradicionalone mesalyake dyilaki melodia, intonacia so śaj te aśunel pe vi ande Indiaki autentiko muzika.

|}

Bută Rromane

E romane bùtyange śerune xaraktera si o fleksibiliteto taj o biumblavdipe. Na sar e butyarne so umblavena pe penge pokinatar, von bikinen penge sevimata (servizo) taj keren śefto e gadźikane populaciasa. O kontakto e gadźenca numaj pala śeftura aćhol. Kado biumblavdipe si garantuime khatar o fakto, kajso e rom butyarena ande ekonomikane jekhetanipe.

Naj vastno/importanto e grupa te si phirutni vaj beśli, e tradicionalna rom sa jekh butyi kerena ande jekh kumpania – kana e krujalimata mekena kodo. Sarso vi maśkar e Indiaki kast sistema, arakhela pe relacia maśkar e grupa taj e profesia, i butyi so kerela. Vi e grupe so zumade te bilaren maśkar pende e gadźe, zumaven te inkren kadala strukture sarso śaj.

E tradicionalone grupangi etnikani identiteta si zurardo khatar o fakto, ke but romane grupi buśona pala pengi tradicionalno butyi:

Kalderaš

Lovara

Ursari

Čurara

Lautari

Drabarni

Rromane Anava


Murśane

A

Aladar, Andrzej, Arben, Artani, Aziz


B

Babalaj, Babali, Badu, Bádo, Bádya, Bagara, Bakaloj, Bakro, Baliśo, Balo, Baluri, Balyári, Bambula, Bandi, Bandula, Bango, Banúko, Barbáro, Bébi, Beno, Bera, Beregáno, Besnik, Bexhet, Bidsika, Bimbaj, Bóbo, Boboko, Bóća, Boiko, Bójko, Boldor, Bológa, Bóltoś, Bóto, Branko, Bretyáno, Briklya, Brúno, Buculo, Bućuma, Bukuro, Bumbáka, Bumbáko, Bumbulo, Bunika, Burika, Burtika, Burtya, Buśa, Búta, Butsulo


C

Ćajko, Ćandiri, Ćepi, Carcajla, Ćervonco, Ćića, Ćiga, Ćilibáti, Ćimbria, Cino, Coica, Ćokirta, Ćóldi, Comon, Ćompi, Corin, Ćuća, Ćukuráno, Ćukuro, Ćúla, Ćulika, Cúra, Ćuxno


D

Dámo, Dandva, Danko, Dica, Dilaver, Dilinko, Dinga, Dirzári, Dobroźáno, Dóda, Dodo, Domino, Drágo, Drila, Dúka, Dumitraśka, Dumitro, Duntshi, Duśáno, Dyordyi, Dyúra, Dyurika, Dźivan


E

Emilian


F

Fantak, Fárdi, Fárkuś, Ferka, Fonso, Fránci, Frinka, Frinkulo, Fróśka


G

Gak, Gána, Gimi, Gógo, Gópa, Granća, Greśa, Grofo, Gruja, Guaril, Gunada, Gunari, Guráno, Gurica, Gurúva, Gusti


H

Hanzi, Harman, Hirco, Honko


I

Imbrija, Inga, Ion, Iśvan, Izóto


J

Janći, Janko, Janoro, Janoś, Jaśa, Joca, Joni, Jośka, Jubo


K

Káco, Kako, Kalderaśa, Kalia, Kálo, Kandoj, Karćulo, Karfója, Kika, Kiko, Koćo, Kokoj, Kolev, Kolja, Koja, Koloro, Kore, Kostika, Krenar, Krestevéco, Kuláj, Kunyáśko, Kúza


L

Laci, Laco, Laetshi, Lajoś, Lali, Lanćo, Lángo, Lángos, Lázo, Lévulo, Lika, Lobo, Loiza, Lólo, Luca, Luciano, Luluvo, Lumbo


M

Máko, Mali, Manciu, Mario, Marko, Máśo, Matej, Máto, Merćak, Merikano, Mićo, Mihaj, Mikloś, Milane, Milordo, Miloś, Mircea, Mirkoś, Mitráno, Mitsho, Mixájla, Móśa, Moyo, Múrga, Múrgulo, Múrśa, Múta, Mutshoro


N

Nanoś, Nikolaj, Niku, Ninga, Nonoka, Notarka, Nuzi


P

Páka, Pali, Palko, Panć, Pani, Papa, Papado, Patyano, Peppo, Péro, Petro, Petruś, Petsha, Piko, Pinćika, Pitivo, Pitti, Plamen, Popoj, Potáko, Primári, Pulika, Puludy, Punka, Pupi, Pupoś, Putzina


R

Rajko, Rambo, Ramo, Rika, Riśa, Romano, Rumen, Ruva


S

Saip, Śandor, Saporro, Śkelgim, Śtefan, Stevo, Stevulo, Stojko, Strúno


T

Talpa, Tári, ,Tina, Tódoro, Tóma, Tóni, Tośa, Trifulo, Trojáno, Troka, Tróka, Trukáno, Tuntu, Tuntulo


V

Vánga, Váso, Vedel, Veśengo, Veśo, Vojtáko, Vosho


Z

Zlaćo, Zláto


Dźuvlane

A

Antoinette, Anelka, Anuśka, Armanka, Áza


B

Baba, Babi, Babina, Bajana, Bélka, Bica, Bilja, Bina, Binúca, Birka, Birúca, Bisno, Bóra, Botána, Bojála, Boti, Breśa, Brija, Búna, Bruma, Burgulya


C

Cinni, Córa, Cúra, Ćamba, Ćernyavka, Ćilyana


D

Dána, Danira, Dárka, Déna, Diamanta, Diduka, Dika, Dilinka, Dina, Djidjo, Domka, Donka, Dónya, Drága, Drina, Dritta, Dúda, Dudarka, Dulća, Dundya, Dyána, Dyolbána, Dyombála


F

Felástra, Fifika, Florica, Friminka


G

Gána, Gáfa, Gafica, Gaftóna, Grinza, Gúda


K

Káli, Kapica, Káta, Katarina, Káti, Kéza, Kica, Kokána, Kolombina, Keja


L

Lala, Liliana, Lina, Loli, Liza, Ludu, Luga, Lula, Luludja, Luminica, Luna, Lutka, Luśka, Luza, Lyuba, Lyubićka


M

Madóka, Mala, Maliśka, Mára, Mardyola, Marga, Marona, Mimi, Mirella, Mozol


N

Nadja


P

Paparuga, Papin, Paprika, Papusza, Pesha, Phabaj, Pita, Puća


R

Rupa, Rupinka, Ruźa


S

Shofranka, Sidi, Simza, Stanka


T

Tatoya, Terom, Tshaya Tshilaba, Tsura, Tsuritsa


V

Vadoma, Valentina, Viollca


Y

Yolanda